Filmfestival fan Austin

Filmfestival fan Austin Austin Film Festival
plak en tiid
lân	Feriene Steaten
steat	Teksas
county	Travis County
plak	Austin (Teksas)
tiid fan it jier	oktober
bysûnderheden
ôfkoarting	AFF
soarte evenemint	filmfestival
bestean	1994 – no
offisjele webside
austinfilmfestival.com

It Filmfestival fan Austin (Ingelsk: Austin Film Festival), ôfkoarte ta AFF en ek bekend as Filmfestival & Konferinsje fan Austin (Austin Film Festival & Conference), is in filmfestival dat elts jier yn oktober holden wurdt yn 'e Amerikaanske stêd Austin, de haadstêd fan 'e steat Teksas. It evenemint leit him, oars as de measte oare filmfestivals, yn it bysûnder ta op 'e bydragen dy't senarioskriuwers oan 'e filmyndustry leverje, mei't de organisaasje efter it barren fan miening is dat dy histoarysk ûnderskat binne en ûnderwurdearre wurde. Oan it Filmfestival fan Austin kinne sawol lange as koarte films meidwaan en sawol fiktive produksjes as dokumintêres.

It Filmfestival fan Austin waard foar it earst yn 1994 organisearre, doe noch ûnder de namme Filmhert Senarioskriuwerkonferinsje fan Austin (Austin Heart of Film Screenwriters Conference). It barren duorret fjouwer dagen en bestiet njonken filmfertoanings út paneldiskusjes, petearen mei filmmakkers en senarioskriuwers, workshops en foarbylden fan 'e ûntjouwing fan in skript ta in film. Der komme net inkeld filmleafhawwers op ôf, mar ek filmprodusinten, filmregisseurs, ympressario's, filmstudiobestjoerders en fansels senarioskriuwers, mei't dy lêsten op it Filmfestival fan Austin by útstek yn it sintsje set wurde.

Der wurde op it festival fjouwer prizen útrikt:

• Distinguished Screenwriter Award (foar filmsenarioskriuwers)
• Outstanding Television Writer Award (foar tillefyzjesenarioskriuwers)
• Extraordinary Contribution to Filmmaking Award (foar in filmmakker dy't in bysûndere bydrage oan 'e filmyndustry levere hat)
• Extraordinary Contribution to Film – Acting Award (foar in akteur dy't in bysûndere bydrage oan 'e filmyndustry levere hat)